ઉત્તર ગુજરાતમાં કોંગ્રેસની હારના કારણો શું ? 

ઉત્તર ગુજરાત એ કોંગ્રેસ મત બેંકનો ગઢ ગણાય છે. અહીં થતી તમામ રાજકીય બાબતો સમગ્ર રાજ્યને અસર કરે છે. પાટીદાર આંદોલન અને ઠાકોર સેનાનું OBC અનામત બચાવો અહીંથી જ શરૂ થયું હતું અને તેની અસર સમગ્ર ગુજરાતમાં ઊભી થઈ હતી. જેનાથી ઉત્તર ગુજરાતની ભાજપની મત બેંકનુ વ્યાપક ધોવાણ થયું હતું અને કોંગ્રેસ માટે પાટીદાર અને ઠાકોર મતની નવી ધરી વિધાનસભાની ચૂંટણી પહેલા રચાઈ હતી. જે જિલ્લા, તાલુકા અને નગરની ચૂંટણીમાં કોંગ્રેસ તરફી જુવાળ જોવા મળ્યો હતો. જે આ મહિને માર્ચ 2018માં થયેલી બનાસકાંઠા જિલ્લા પંચાયત અને તાલુકા પંચાયતની ચૂંટણી સુધી જોવા મળે છે. તો પછી ગુજરાત વિધાનસભાની ચૂંટણીમાં ઠાકોર સેનાના સુપ્રીમો અલ્પેશ ઠાકોરની મજબૂત પકડ હોવા છતાં કેમ કોંગ્રેસનું ધોવાણ થયું અને 2012માં કોંગ્રેસને મળેલી બેઠક કરતાં પણ બે બેઠક ઉત્તર ગુજરાતમાં ઓછી મળી હતી? તે સવાલ કોંગ્રેસના નેતાઓમાં આજે પણ ઘુમરાય રહ્યો છે. પણ ભાજપના નેતાઓ તો એકદમ સ્પષ્ટ છે કે તેઓ શામાટે જીત્યા છે અને કોંગ્રેસને તેમણે કયા કારણોસર હરાવી છે.