ભાજપ કોંગ્રેસના ધારાસભ્યો 2017

વિધાનસભા ચૂંટણીનું પરિણામ હવે સ્પષ્ટ થઇ ગયું છે. ગુજરાત રાજ્યમાં ભાજપે ચૂંટણી પરિણામમાં શાનદાર જીત હાંસલ કરી લીધી છે. વિધાનસભાની 182 બેઠકોમાં ભાજપે 99, કોંગ્રેસે 80 અને અન્યએ 3 સીટો હાંસલ કરી લીધી છે.

14મી વિધાનસભા રચવા માટે ગુજરાતની જનતાએ ભાજપને સળંગ છઠ્ઠી વખત બહુમતીથી જનાદેશ આપી દીધો છે. જનાદેશ-2017 મુજબ રાજ્યમાં ભાજપે 99 બેઠક પર જીત મેળવી છે જ્યારે કોંગ્રેસને 80 બેઠક પર વિજય મળ્યો છે તેમજ અન્ય 3 બેઠક પર જનતાએ અપક્ષને વિજય શ્રી પહેરાવી છે.

આ સાથે જ ભાજપ 99 બેઠકો સાથે ફરી વખત સત્તા કબ્જે કરશે તો 80 બેઠકો સાથે કોંગ્રેસ પણ મજબૂત વિપક્ષ તરીકે સરકારનાં કાન આમળશે. ઉલ્લેખનીય છે કે, ચૂંટણી પહેલા રાજ્યમાં ઊભા થયેલા વિવિધ જાતિગત આંદોલનોને કારણે ભાજપને 2012ની સરખામણીએ 18 સીટનું નુકસાન થયું છે તો સામે પક્ષે કોંગ્રેસને 19 સીટનો ફાયદો થયો છે.

આ સાથે 3 સીટ અપક્ષ અને NCPને ફાળે ગઈ છે. આ અંગે મુખ્યમંત્રી વિજય રૂપાણીએ વાત કરતાં જણાવ્યું હતું કે, ઘટેલી બેઠકો અંગે આત્મમંથન કરીશું. સાથે જ તેમણે લોકોએ વિકાસને સમર્થન આપ્યું હોવાની પણ વાત કરી હતી.

સીએમ વિજય રૂપાણીએ ભાવિ મુખ્યમંત્રી અંગે વાત કરતા જણાવ્યું હતું કે,”તે અંગેનો નિર્ણય હાઈકમાન્ડ કરશે. તો આ તરફ કોંગ્રેસમાં વિપક્ષ નેતા પદે પરેશ ધાનાણીનું નામ ચર્ચામાં છે.”

ઉલ્લેખનીય છે કે ગુજરાતમાં ભાજપની શાનદાર જીતને લઇ પીએમ નરેન્દ્ર મોદી, સીએમ વિજય રૂપાણી, ભાજપ અધ્યક્ષ અમિત શાહે ગુજરાતની જનતાનો આભાર માન્યો હતો. પીએમ નરેન્દ્ર મોદીએ ભાજપની જીતને લઇ ટ્વિટ કરતા કહ્યું કે,”જીતા વિકાસ, જીતા ગુજરાત, જય જય ગરવી ગુજરાત. આ સિવાય પણ ટ્વિટ કરતા કહ્યું કે હિમાચલ પ્રદેશમેં લહરાયા કમલ, વિકાસકી હુઇ ભવ્ય જીત.”

પીએમ મોદીએ જનતાનો આભાર માનતા કહ્યું કે,”જનતાએ ગુડ ગવર્નન્સ અને વિકાસને સમર્થન આપ્યું છે. હું ભાજપનાં કાર્યકરોની મહેનતને સલામ કરૂ છું. અને તેને લીધે જ આ જીત શક્ય બની છે. ગુજરાત અને હિમાચલનાં લોકોએ ભાજપ પ્રત્યે પ્રેમ દર્શાવ્યો તે બદલ હું તેમનો આભારી છું. હું હવે તમને આશ્વાસન આપું છું કે વિકાસ ગાથામાં હવે કોઈ પણ પ્રકારની કચાશ નહીં રહે.”

ભાજપે 99 બેઠક સાથે ફરીથી સત્તા કબ્જે કરી છે. 2017ની સરખામણીએ ભાજપની 18 સીટ ઘટી ગઇ છે અને 2017ની સરખામણીએ કોંગ્રેસની 19 સીટ વધી ગઇ છે.ભાજપને 49 ટકા તથા કોંગ્રેસને 41 ટકા મત મળ્યા છે. કેટલાક મતદારોએ 5.50 લાખ મત NOTAમાં નાખ્યા છે. જ્યારે ચાર ટકા મત અપક્ષોનાં ખાતામાં ગયાં.

આ ચૂંટણીમાં શહેરી જનતાનો મિજાજ ભાજપ સાથે જોવાં મળ્યો અને ગ્રામ્ય જનતાનો મિજાજ કોંગ્રેસ તરફી જોવાં મળ્યો છે. જો કે પીએમ મોદીએ ગુજરાત અને હિમાચલ પ્રદેશની વિધાનસભા ચૂંટણીમાં ભાજપે જીત મેળવતા પાર્ટી કાર્યકરોને શુભેચ્છા પાઠવી છે.