ગુજરાતી
English
ડીસા, તા.૧૨
ડીસામાં શુક્રવારે ફૂડ એન્ડ ડ્રગ્સ વિભાગે હરસોલિયાવાસ વિસ્તારમાં આવેલા સાગર દેવચંદભાઈ પંચીવાલાના ગોડાઉનમાં અચાનક રેડ કરી શંકાસ્પદ ઘી ના બે સેમ્પલો લઇ રૂ.6 લાખનો શંકાસ્પદ મુદ્દામાલ સિઝ કર્યો હતો. બીજી તરફ જીઆઇડીસીમાં પીનાક મસાલાની ફેકટરીમાંથી મરચા પાવડર અને નયન મસાલા ફેક્ટરીમાંથી હળદર પાવડરના સેમ્પલો લઇ આગળની કાર્યવાહી હાથ ધરી છે.
ખાદ્ય પદાર્થોમાં ભેળસેળ તથા ડુપ્લીકેટ વસ્તુઓ માટે હબ ગણાતા ડીસામાં શુક્રવારે જિલ્લા ફૂડ એન્ડ ડ્રગ્સ વિભાગના અધિકારી ડી.જી.ગામીત તથા તેમની ટીમે અંગત બાતમીના આધારે ડીસામાં ત્રણથી વિવિધ જગ્યાએ દરોડા પાડ્યા હતા. જેમાં શહેરના હરસોલિયાવાસ વિસ્તારમાં આવેલ સાગર દેવચંદભાઈ પંચીવાલાના ગોડાઉનમાં અચાનક રેડ કરી ફૂડ વિભાગે શંકાના આધારે હેપ્પી તથા રાજ બ્રાન્ડ ઇન્ટર એસટી ફાયર બ્રાન્ડ ઘીના બે સેમ્પલો લીધા હતા. ઉપરાંત છ લાખ રૂપિયાનો શંકાસ્પદ મુદામાલ સીઝ કર્યો હતો. દરમિયાન જીઆઇડીસીમાં આવેલ પીનાક મસાલાની ફેકટરીમાંથી મરચા પાવડરના સેમ્પલ લેવામાં આવ્યા હતા. નયન મસાલા ફેક્ટરીમાંથી હલદી પાવડરના સેમ્પલો લીધા હતા.
