સાબરકાંઠાની શાળાના આચાર્ય પાકીટ ચોરતાં સીસીટીવીમાં કેદ

હિંમતનગર, તા.૨૫

સંસ્કારનુ સિંચન કરતા સારસ્વત પણ ચલણી નોટોની ગરમીને જીરવી નહીં શકતાં આભાર વ્યક્ત કરવા ઉભા થયેલ સાથી આચાર્યનું પાકીટ સોફામાં પડી જતા ખોલીને ચેક કરી અંદર વધુ પૈસા જણાતાં પોકેટ થેલીમાં મૂકી રવાના થઇ જવાની આખીયે ઘટાના સીસીટીવી કેમેરામાં કેદ થઇ ગયા હતા.

ગત તા. 10-09-19ના રોજ ગાંધીનગરમાં આચાર્ય સંઘની બેઠક યોજાઇ હતી. બપોરે બેઠક પૂરી થતા ગાંધીનગર આચાર્ય સંઘના પ્રમુખ પ્રદીપસિંહ આભાર વિધિ કરવા ઉભા થતા તેમનુ પાકીટ ખિસ્સામાંથી સોફા પર પડી ગયુ હતુ અને કાર્યક્રમ પૂર્ણ થયા બાદ પાકીટ ચોરાઇ ગયાની ખબર પડતા તેમણે સીસીટીવી ફૂટેજ ચેક કરતાં ફૂટેજમાં તેમની બાજુમાં બેઠેલા સા.કાં. જિલ્લાના સાથી આચાર્ય પાકીટ લઇ ખોલીને તેમાં વધુ પૈસા હોવાનું જણાતા કોઇ જોતુ નથી તેની ચકાસણી કરી થેલીમાં મૂકતા જોવા મળ્યા હતા.

આ ફૂટેજને તેમણે અન્ય આચાર્યોને મોકલી વાત કરતાં પાકીટ લઇ જનાર સારસ્વતે સ્પષ્ટ ઇન્કાર કરી દીધો હતો. પરંતુ ફૂટેજ બતાવ્યા બાદ સાંકડે આવ્યા હતા અને સાડા ચાર હજાર જેટલા રૂપિયા વાપરી કાઢ્યા હોઇ ઓછા મોકલ્યા હોવાનુ પ્રદીપસિંહે જણાવ્યુ હતુ. ઘટનાને પગલે જિલ્લાના આચાર્ય સંઘમાં પણ ખળભળાટ મચી ગયો છે.