ઉપરવાસમાં ભારે વરસાદને પગલે આજી ડેમમાં પાણીની ભરપૂર આવકઃ ઓવરફ્લોની મજા માણતા રાજકોટવાસીઓ

રાજકોટ,તા.09 રાજકોટ સહિત સમગ્ર સૌરાષ્ટ્ર અને ગુજરાતમાં ચોમાસુ જામ્યુ છે.  ઉપરવાસમાં પણ પડી રહેલા વરસાદના કારણે આજી ડેમમાં નવા નીરની ભરપૂર આવક થઇ રહી છે ત્યારે આજીડેમ  સતત ઓવરફ્લો થઇ રહ્યો છે. ત્યારે રાજકોટવાસી  આજી ડેમમાં નાહવાની મઝા માણવા મોટી સંખ્યામાં પહોંચ્યાં હતાં વરસાદ વરસવાની સાથે રાજકોટને પીવાના પાણીની સમસ્યાથી છૂટકારો મળી ગયો છે. મુશળધાર વરસાદનાં કારણે તમામ  જળાશયો અને ડેમમાં નવા નીરની જોરદાર આવક થઈ રહી છે. રાજકોટ શહેરને વર્ષ દરમિયાન પાણી પુરું પાડતા ભાદર, આજી અને ન્યારી ડેમની પાણીની સપાટીમાં અભૂતપૂર્વ વધારો નોંધાયો છે. મોરબીના વાડીસંગ ડેમમાં પણ પાણીની આવક થઈ છે. નોંધનીય છે કે આજી-1, આજી-2 આજી-3 સંપૂર્ણ ભરાયાં છે. આ ઉપરાંત ચાપરવાડી- 1 કબીર સરોવર, ચાપરવાડી-2 ડેમી 1/2/3 ઑવરફ્લો થયાં છે. જ્યારે ધોળીધજા, કંકાવટી, ખોડાપીપપર. લિંબીડી ભોગાવો-1, મચ્છુના ત્રણે ડેમ, ડેમ છલકાયા છે. ડેમની આસપાસ રહેતા લોકોને પણ સલામત સ્થળે ખસી જવાની ચેતવણી આપવામાં આવી છે. હાલ સહેલાણીઓ મઝા માણી રહ્યાં છે ત્યારે પોલીસ કાફલો પણ ખડકી દેવામાં આવ્યો છે.