ગુજરાતી
English
06,મોરબી
મોરબી એલ.સી.બી. ટીમે ગાંજોનો જથ્થો ઝડપી પાડ્યો છે.મોરબીના લાતી પ્લોટ વિસ્તારમાંથી ૨૧ કિલો ગાંજો ઝડપાયો હોવાના અહેવાલથી ચકચાર મચી ગઇ છે. પોલીસની પ્રાથમિક તપાસમાં મળેલી માહિતી અનુસાર ખાનગી ટ્રાવેલ્સમાં ગાંજો સુરતથી મોરબી મંગાવવામાં આવ્યો હતો. જોકે મોરબીમાં ખાનગી ટ્રાવેલ્સમાં પાર્સલ આવેલ હતું. પોલીસે મળેલી બાતમીના આધારે વોચ ગોઠવી હતી તેમજ ગાંજો મંગાવનાર પાર્સલ લેવા આવે તેની પોલીસ રાહ જોઇ રહી હતી. ગાંજાનો વેપલો કરનારાને રંગે હાથ ઝડપી પાડવા માટે પોલીસે વોચ ગોઠવી હતી. ગાંજાના પાર્સલ લેવા જેવા જુબેર અબ્દુલ મન્સૂરી ખાનગી ટ્રાવેલ્સ પર આવ્યો કે તરત જ તેને ગાંજાના જથ્થા સાથે ઝડપી પાડવામાં આવ્યો હતો. જ્યારે અન્ય એક સખ્શ આમદ સતારભાઈ મેમણનું નામ ખુલતા તેને ઝડપી પાડવા પોલીસે તજવીજ હાથ ધરી છે. ત્યારે સવાલ એ થાય છેકે મોરબીમાં નશાનો કારોબાર કોણ ચલાવીરહ્યું છે અને કેટલા વખતથી આવો વેપલો ચાલતો હતો તેની પણ તપાસ કરવામાં આવી રહી છે. મોરબીમાં અત્યાર સુધીમાં કેટલો ગાંજો આવ્યો અને ક્યાં ક્યાં તેની ડિલિવરી કરવામાં આવી તે અંગેના તમામ પાસાની પોલીસ તપાસ કરી રહી છે.
