ગૃહરાજ્યપ્રધાનના મતવિસ્તાર વટવામાં બેફામ બનેલા બુટલેગરનો દંપતી પર હુમલો

અમદાવાદ, તા. 26

રાજ્યમાં દારૂબંધીની કડક અમલવારી થતી હોવાની સરકારની વાતો વચ્ચે અમદાવાદ શહેરમાં બુટલેગરો બેફામ અને બેખોફ બન્યા છે. રાજ્યના ગૃહરાજ્યપ્રધાનના વિસ્તાર એવા શહેરના વટવા પોલીસ મથકની હદમાં બુટલેગરોએ ચાની કીટલી ચલાવતાં પતિ-પત્ની પર હુમલો કર્યો હતો. બુટલેગરોએ લાકડી અને લોખંડના સળિયા વડે દંપતીને માર મારી તેમનો CCTV કેમેરા પણ તોડી નાખ્યો હતો. હકીકત એવી હતી કે થોડા દિવસ અગાઉ આ બુટલેગરોનો દારૂ પકડાયો હતો. આ દારૂ અંગેની બાતમી આ કીટલી ચલાવતાં દંપતીએ પોલીસને આપી હોવાની શંકા રાખીને બુટલેગરોએ પતિ-પત્નીને ઢોરમાર માર્યો હતો, જે અંગે પોલીસ ફરિયાદ નોંધાવાઈ છે.

રાજ્યમાં એક તરફ કડક દારૂબંધીની અમલવારી કરવામાં આવી રહી હોવાની વાતો સરકાર દ્વારા કરવામાં આવી રહી છે, ત્યારે રાજ્યના ગૃહરાજ્યપ્રધાન પ્રદીપસિંહ જાડેજાના મત વિસ્તાર એવા વટવામાં બુટલેગરોને પોલીસનો કોઈનો ડર કે ભય ન હોય તેવી સ્થિતિ સર્જાઈ છે. જો કે આ ઘટના આજથી નવ દિવસ અગાઉ બની છે. જો કે મોડેથી પોલીસ ફરિયાદ કરવામાં આવતા આ ઘટનાના સીસીટીવી ફૂટેજ સામે આવ્યા છે. આ સીસીટીવી ફૂટેજમાં સ્પષ્ટ રીતે જોવા મળી રહ્યું છે કે, સાતેક જેટલા શખ્સો દ્વારા એક દંપતીને માર મારવામાં આવી રહ્યો છે.

પ્રાથમિક તપાસમાં બહાર આવેલી વિગતો મુજબ કીટલી ચલાવતાં દંપતી પર હુમલો કરનારા શખ્સો બુટલેગરો હોવાનું બહાર આવ્યું છે. આ બુટલેગરોને એવી શંકા હતી કે, થોડા દિવસ અગાઉ વટવા પોલીસ દ્વારા તેમનો દારૂનો જથ્થો પકડાયો હતો તે અંગેની માહિતી આ દંપતીએ પોલીસને આપી હતી. જેથી આ બાબતે રાગદ્વેષ રાખીને બુટલેગરોએ એક અઠવાડિયા અગાઉ દંપતી પર લાકડી અને લોખંડના પાઈપ વડે તૂટી પડ્યા હતા.

બુટલેગરોના હુમલાથી ડરી ગયેલાં દંપતીએ તેમના ચુંગાલમાંથી છૂટવા માટેના અનેક પ્રયાસો કર્યા હતા, પરંતુ હથિયારધારી બુટલેગરોને જાણે કે પોલીસનો કોઈ ડર કે ખોફ જ ન હોય તેમ તેઓ એકસાથે લાકડી, લોખંડના સળિયા સહિતનાં હથિયારો વડે તેમની ઉપર તૂટી પડ્યા હતા. દંપતીને માર મારતાં મારતાં એક બુટલેગરની નજર સીસીટીવી કેમેરા સામે પડી હતી, જેથી તેણે લાકડી વડે કેમેરા પર પ્રહાર કરીને કેમેરાને પણ તોડી નાખ્યો હતો. જો કે મોડેથી આ મામલે પોલીસ ફરિયાદ નોંધાયા બાદ સીસીટીવી કેમેરાના ફૂટેજ પોલીસને મળી આવ્યા હતા. આ સમગ્ર મામલે પોલીસે ગુનો નોંધી તપાસ હાથ ધરી છે.