દર્દી મહિલાઓ સાથે ડોક્ટર મહેન્દ્ર મોદી અને પૂત્ર શારીરિક સંબંધ કરતો હતો

1 સમીમાં ડોક્ટરની કામલીલાનો ભાંડાફોડ થયો, સોશ્યલ મીડિયામાં વીડિયો વાઈરલ

2 સારવાર માટે આવતી મહિલાઓનું ડોક્ટર મહેન્દ્ર મોદી શારીરિક શોષણ કરતો હતો

3 ડોક્ટર મોદીનો પુત્ર કિશન પણ તેનાં બાપની પાપલીલામાં ભાગીદાર, કિશન વગર લાઈસન્સે સમીમાં ચલાવતો હતો દવાખાનું

પાટણ, સામાન્ય રીતે ડોક્ટરને ભગવાનનું બીજું રૂપ ગણવામાં આવે છે. પરંતુ જ્યારે ડોક્ટર જ શૈતાન બની જાય ત્યારે દર્દી કોને ફરિયાદ કરે. આવો જ એક કિસ્સો પાટણ જિલ્લાનાં સમીમાં બહાર આવ્યો છે. અહીંના ડોક્ટર મહેન્દ્ર મોદી મહિલાઓનાં ચેક અપનાં બહાને તેમની સાથે શારીરિક સંબંધો બાંધી મોબાઈલમાં વીડિયો ઉતારતો હોવાનું બહાર આવતાં ચકચાર મચી ગઈ છે. આ ડોક્ટરની આ કામલીલામાં તેનો પુત્ર પણ સહભાગી હોવાનું ખૂલ્યું છે.

આ અંગે પ્રાપ્ત માહિતી અનુસાર સારવારના બહાને કેટલાંક ખાનગી તબીબો મહિલા દર્દી સાથે અશ્લિલ કૃત્ય કરતાં હોવાની ઘટનાઓ સમયાંતરે સામે આવતી રહે છે, ત્યારે પાટણના સમી ખાતે આવી જ એક વિકૃત માનસિકતા ધરાવતા તબીબ પિતા-પુત્રનો મહિલા દર્દી સાથે અપકૃત્ય કરતો અશ્લિલ વિડીયો સામે આવ્યો છે. જેમાં છેલ્લા 30 વર્ષથી દવાખનું ચલાવતા આ બન્ને તબીબ બાપ-બેટાનો બિભત્સ વિડીયો સામે આવતાં લોકોએ મેથીપાક આપી પોલીસ હવાલે કર્યા હતા. ત્યારે પોલીસે વિડીયો આધારે તપાસ હાથ ધરી છે.

વીડિયો સોશ્યલ મીડિયામાં વાઈરલ થયો

સમીના ડોક્ટર મહેન્દ્ર મોદી છેલ્લા 30 વર્ષથી સમી બજારમાં ચાર રસ્તા પાસે દવાખાનું ચલાવતાં ડોક્ટરે હેવાનિયતની તમામ પ્રકારની હદ વટાવી હતી. દવાખાનામાં સારવાર માટે આવતી મહિલાઓના ચેક અપના બહાને પોતાનાં તપાસ રૂમમાં લઈ જઈ તેમની સાથે શારીરિક સંબંધો બાંધીને મોબાઈલમાં વીડિયો ઉતારતો હોવાનું બહાર આવ્યું છે. ડોક્ટરના ઉતારેલા વીડિયો સોશ્યલ મીડિયામાં વાઈરલ થતાં સમીનાં રહેવાસીઓએ હોસ્પિટલ પર પહોંચી જઈને તેની ધોલાઈ કરી નાંખી હતી.

ડોક્ટર મહેન્દ્ર શનિ-રવિ દવાખાને જતો

સારવાર કરાવવા આવતી મહિલાઓ સાથે શારીરિક સંબંધોનો ભાંડો ફૂટતાં લોકોએ મહેસાણાના ડોક્ટર મહેન્દ્ર મોદીની બરાબરની ધોલાઈ કરી હતી. આ ડોક્ટર દર શનિવાર અને રવિવારે સમી ખાતેના દવાખાને આવતો હતો. બાકીના દિવસોમાં તેનો દિકરો કિશન વગર લાઈસન્સે આ દવાખાનું ચલાવતો હતો. મહિલાઓ સાથેના શારીરિક સંબંધો સમયે ડોક્ટરનો દિકરો પણ સહભાગી થતો હતો. બાપ-દીકરો મહિલાઓના વીડિયો ઉતારતા હતા.

ઘટનાની જાણ થતાં જિલ્લા પોલીસ વડા સમી પહોંચ્યા

વીડિયો વાઈરલ થતાં લોકોએ તબીબ અને તેના પુત્રને મેથીપાક ચખાડ્યો હતો. બાદમાં પોલીસને હવાલે કરવામાં આવ્યાં હતાં. ઘટનાને પગલે સમગ્ર જિલ્લામાં ભારે ચકચાર મચી ગઈ છે. આ ઘટનાને પગલે પાટણ જિલ્લા પોલીસ વડા શોભાબહેન ભૂતાડા સમી પોલીસ સ્ટેશન પહોંચી ઘટનાની તપાસ કરી હતી.