રાજયની યુનિવર્સિટીઓઅને કોલેજોમાં ખાલી પડેલી જગ્યાઓ તા.૧૦મી નવેમ્બર પહેલા ભરો : યુજીસી

અમદાવાદ, તા.૨૩

યુનિવર્સિટી ગ્રાન્ટ કમીશન દ્વારા તાજેતરમાં દરેક યુનિવર્સિટીઓ અને કોલેજોને એક પરિપત્ર મોકલીને જુદી જુદી ફેકલ્ટીઓમાં ખાલી પડેલી જગ્યા ૧૦મી નવેમ્બર સુધીમાં ભરીને તેની વિગતો યુજીસીની વેબસાઇટ પર અપલોડ કરવા તાકીદ કરવામા આવી છે. જો તારીખ સુધીમાં કોલેજોને યુનિવર્સિટી દ્વારા આ પ્રકારની કામગીરી કરવામા ન આવે તો તેન સામે દંડનાત્મક કાર્યવાહી કરવાની ચીમકી પણ આપવામાં આવી છે.

યુનિવર્સિટી ગ્રાન્ટ કમીશન છેલ્લા કેટલાય વખતથી યુનિવર્સિટીઓ અને કોલેજોમાં ખાલી પડેલી અધ્યાપકો સહિતની જુદી જુદી જગ્યાઓ વહેતી તકે ભરી દેવા સૂચનનાઓ આપી રહી છે. આ પ્રકારની પરિસ્થિતિના કારણે તા.૨૨મી ઓક્ટોબરના રોજ યુનિવર્સિટી ગ્રાન્ટ કમીશન દ્વારા ફરીવાર દરેક યુનિવર્સિટીઓ અને કોલેજોને નવેસરથી પરિપત્ર મોકલીને યુનિવર્સિટી અને સંલગ્ન કોલેજમાં ખાલી પડેલી બેઠકો વહેલીતકે ભરી દેવા આદેશ કરવામાં આવ્યો છે. યુજીસીએ પરિપત્રમાં એવી તાકીદ પણ કરી છે કે, અધ્યાપકોની ખાલી જગ્યાઓના કારણે વિદ્યાર્થીઓના અભ્યાસ પર ગંભીર અસર પડી રહી છે. આ પરિપત્રમાં યુજીસીએ એવી સ્પષ્ટતાં દરેક કોલેજો અને યુનિવર્સિટીએ પોતાને ત્યાં ખાલી પડેલી જગ્યાઓ ભરીને તે અંગેનો સ્ટેટસ રિપોર્ટ આગામી તા.૧૦મી નવેમ્બર અથવા તો તે પહેલા યુજીસીની વેબસાઇટ પર અલગ બનાવવામાં આવેલા પોર્ટલમાં મુકવાનો રહેશે. જે કોલેજો અ‌થવા તો યુનિવર્સિટીઓ ખાલી પડેલી જગ્યાઓ ભરવામાં બેદરકારી દાખવશે તેની સામે પગલાં લેવાની ચીમકી પણ આપવામાં આવી છે. હવે યુજીસીએ પણ આ જગ્યાઓ યુજીસીના ધારાધોરણ પ્રમાણે જ ભરવાનો આદેશ કરતાં આગામી દિવસોમાં સરકાર અને અધ્યાપક, આચાર્યમંડળો કેવુ વલણ અપનાવે છે તેના પર ભરતી પ્રક્રિયાઓનો આધાર રહેશે.