વસ્ત્રાપુરમાં વિદેશી યુવતીની જાહેરમાં છેડતી કરાઈ

અમદાવાદ, તા. 15.
શહેરના વસ્ત્રાપુરમાં ડ્રાઈવઈન સિનેમા પાસે એક વિદેશી યુવતીની છેડતી કરાયાનો બનાવ બનવા પામ્યો છે. આ ઘટના અંગેની ફરિયાદના આધારે વસ્ત્રાપુર પોલીસે ગુનો નોંધીને તપાસ હાથ ધરી છે.

આ ઘટના અંગે પ્રાપ્ત થતી વિગતો મુજબ અન્ના મારિયા નામની એક વિદેશી યુવતી ઈટલીથી અમદાવાદમાં અભ્યાસ કરવા માટે આવી છે. છેલ્લા કેટલાક સમયથી તેણી શહેરના ડ્રાઈવઈન રોડ વિસ્તારમાં આવેલ એક ફ્લેટમાં રહે છે.

ગઈકાલે મોડી સાંજે આ ઇટાલિયન યુવતી ડ્રાઈવઇન રોડ પરથી પસાર થઇ રહી હતી, તે સમયે બાઇક પર સવાર થઈને આવેલા અજાણ્યા યુવકે આ વિદેશી યુવતીની સાથે શારીરિક છેડછાડ કરી હતી. છેડતી કરતાં યુવતીએ બૂમાબૂમ કરતાં અજાણ્યો યુવક છેડતી કરનાર શખ્સ તેની બાઇક લઈને રફુચક્કર થઈ ગયો હતો.

ઇટાલિયન યુવતી દ્વારા પોતાની સાથે થયેલી છેડતીની આ ઘટના અંગેની જાણ વસ્ત્રાપુર પોલીસને કરવામાં આવી હતી. જે અંગે વસ્ત્રાપુર પોલીસે છેડતીનો ગુનો નોંધી વિદેશી યુવતીની સાથે શારીરિક છેડતી કરનાર શખ્સની ધરપકડ કરવા માટે ચક્રો ગતિમાન કરી દીધાં છે