સાબરડેરી દ્વારા દૂધના કિલોફેટના ભાવમાં રૂ.10નો વધારો કરાતાં પશુપાલકોમાં આનંદ

હિંમતનગર, તા.૨૪

માર્ચ-2019 થી ઓક્ટો-2019 દરમિયાન નિયમિત અંતરાલે કિલોફેટના ભાવમાં સતત વધારાને પગલે પશુપાલકોમાં આનંદની લાગણી પ્રવર્તી રહી છે, સાથે સાથે નવી શંકાઓ સાથે વાર્ષિક ભાવ ફેરમાં અગામી વર્ષે ઘટાડો થવાની ભીતી પણ પેદા થઇ છે. સાબરડેરીએ તા. 25/10/19 થી અમલી રૂા.10 નો ભાવ વધારી પશુપાલકોને દિવાળી ગીફ્ટ આપી છે.

સાબરડેરી દ્વારા અગામી 25 ઓક્ટોબરથી ભેંસના દૂધમાં કિલો ફેટના ભાવમાં રૂા.10 નો વધારો કરી રૂા.700 અને ગાયના દૂધના ભાવમાં રૂા.4.50 નો વધારો કરી રૂા.304.50 ચૂકવવાનો નિર્ણય કરવામાં આવ્યો છે. સાબરડેરીમાં નવા નિયામક મંડળની માર્ચ મહિનામાં ચૂંટણી થયા બાદ પશુપાલકોની જાણે લોટરી લાગી ગઇ છે. ડીસે-18 થી માર્ચ-19 દરમિયાન કિલોફેટના ભાવમાં સતત ઘટાડા બાદ છેલ્લા 6 માસ દરમિયાન કિલોફેટના ભાવમાં કુલ રૂા.120 નો સાબરડેરી દ્વારા વધારો કરવામાં આવ્યો છે.