ગુજરાતી
English
અમદાવાદ, તા.21
સોલા સિવિલ હોસ્પિટલમાંથી સતત થઈ રહેલી રિક્ષા ચોરીના પ્રકરણમાં તપાસ કરી રહેલી પોલીસ હોસ્પિટલ કેમ્પસના 24 સીસીટીવી કેમેરા ચકાસતા ચોંકી ગઈ હતી. 24 પૈકીના માત્ર ત્રણ કેમેરા સંપૂર્ણપણે કાર્યરત હોવાની માહિતી ધ્યાને આવતા સોલા પીએસઆઈ હોસ્પિટલના ઉચ્ચ અધિકારીને વાકેફ કરવા ગયા હતા. જો કે, સોલા સિવિલના ઉચ્ચ અધિકારીએ તેમના સ્વભાવ મુજબ પીએસઆઈ સાથે બેહુદુ વર્તન કર્યું હતું. છેલ્લા કેટલાક દિવસોથી સોલા સિવિલ હોસ્પિટલમાં પાર્ક કરાતી ઓટોરિક્ષા ચોરી થઈ જતી હતી. આ બાબત ડીસીપી પી.એલ.માલના ધ્યાને આવતા તેમણે સોલા પોલીસ સ્ટેશનના પીઆઈને સોલા સિવિલ હોસ્પિટલમાં કેટલા સિક્યુરિટી ગાર્ડ છે તેમજ કેમ્પસમાં લાગેલા સીસીટીવી કેમેરાની શું સ્થિતિ છે તેની માહિતી માંગી હતી. આ મામલે તપાસ કરતા સોલા સિવિલ કેમ્પસમાં લાગેલા 24 સીસીટીવી કેમેરામાંથી માત્ર ત્રણ કેમેરા ચાલુ હાલતમાં મળ્યા હતા. સોલા પોલીસે રિક્ષા ચોરી અટકાવવા
સર્વેલન્સ સ્ટાફને વોચ રાખવા માટે તૈનાત કરી દીધો હતો. દરમિયાનમાં સોલા પોલીસને રિક્ષા ચોરી કરતી ગેંગને પકડવામાં સફળતા મળી છે. સોલા પોલીસ સ્ટેશનના પીએસઆઈ હોસ્પિટલના ઉચ્ચ અધિકારીને મળવા ગયા ત્યારે તેમણે પટ્ટાવાળાને બોલાવી મારી ઓફિસમાં કોઈપણ ઘૂસી જાય છે તેનું ધ્યાન રાખો તેમ કહી પોલીસ સ્ટાફ સાથે બેહુદુ વર્તન કર્યું હતું.
