ભરૂચમાં ઘોડી પર મગરનો હુમલો

• ફૂલવાડી ગામની ખાડી કિનારે ચરતી ઘોડીના પાછળના ભાગે મગરે હુમલો કરી ગંભીર રીતે ઘાયલ કરી

ઝઘડિયા તાલુકાના ફૂલવાડી ગામના જસવંતસિંહ કરશનસિંહ પરમાર નામના ખેડૂતની ઘોડી પર દિરયાની ખાડીના કિનારે ચરતી ઘોડી પર મગરે હુમલો કર્યો છે. ઘોડીના પાછળના ભાગે હુમલો કરતા ઘોડીની હાલત ગંભીર છે.

હુમલામાં બંને વચ્ચે ખેંચાતાણી થઇ હતી. આખરે મગર ઘોડીને ઈજાગ્રસ્ત કરી પાણીમાં ગરકાવ થઇ ગયો હતો. મગરના હુમલાની જાણ ગામમાં થતા મોટી સંખ્યામાં ગ્રામજનો ઘટના સ્થળે એકત્ર થયા હતા. ઘોડીની સારવાર અર્થે સ્થાનિક ચિકિત્સકને બોલાવતા તેમને તેની સારવાર હાથ ધરી હતી પરંતુ જીવન મરણવચ્ચે ઝોલા ખાતી ઘોડી ના બચવાની આશા બહુ ઓછી હોવાનું ચિકિત્સકે જણાવ્યું હતું. ઘોડી પર મગરના હુમલાના પગલે ફૂલવાડી ગામમાં મગરનો ભય ફરીથી જીવંત બન્યો છે.

કેટલા માસ થી મગર ખાડીમાં દેખાતો હોઈ વનવિભાગ દ્વારા તેને ઝડપી લેવા પીંજરું મૂક્યું હતું. આ અગાઉ મગરને પકડવા ફૂલવાડી ગામની ખાડીના કિનારે પીંજરું મુકાયું હતું પરંતુ મગર હાથ આવ્યો ના હતો. આ ઉપરાંત સેલોદ, ગુમાનદેવ, નાના સાંજા, ઉચેડિયા વિગેરે ગામોમાંથી પસાર થતી ફૂલવાડી વાળી ખાડીમાં સ્થાનિકો જવાનું ટાળશે એવો મગરના ભયનો માહોલ ઉભો થયો છે.