[:gj]ધોલેરા સોલર પાર્ક પ્રોજેક્ટ માટે 1000 મેગાવોટ વીજ ઉત્પાદન માટે EOI (ઇરાદા પત્રો)મગાવવામાં આવ્યા છે. ગુજરાત ઊર્જા વિકાસ નિગમ લિમિટેડે (GUVNL)એ બહાર પાડેલા ટેન્ડર માટે 20થી વધુ કંપનીઓએ EOI ફાઇલ કર્યા છે. ટૂંક સમયમાં આ અંગે બિડિંગની પ્રક્રિયા હાથ ધરાશે.
ગુજરાત સરકાર વાઇબ્રન્ટ ગુજરાત ગ્લોબલ સમિટ અગાઉ ધોલેરામાં માળખાગત સુવિધા સ્થાપી રહી છે, તેવા સંજોગોમાં વીજળીની જરૂરિયાત માટે કેન્દ્ર સરકાર વતી GUVNLએ 500 મેગાવોટનો સોલર પ્લાન્ટ સ્થાપવાની કામગીરી માટેની પ્રક્રિયા હાથ ધરી છે.
GUVNLના અધિકારીના જણાવ્યા અનુસાર 20થી વધુ કંપનીઓએ રસ દાખવ્યો હતો, જેમાં ટાટા પાવર, ટોરેન્ટ પાવર, NTPC, અદાણી ગ્રીન એનર્જી, એઝ્યોર પાવર, મહિન્દ્રા સસ્ટેન પ્રાલિ, આયના રિન્યુએબલ, વેના એનર્જી, હિન્દુસ્તાન પાવર પ્રોજેક્ટ્સ, આલ્ફનર કન્સ્ટ્રક્શન, એસબી એનર્જીનો સમાવેશ થાય છે. ટૂંક સમયમાં બિડિંગ કામગીરી હાથ ધરાશે તે સમયે ભાગ લેનાર કંપનીઓ આ પ્રોજેક્ટમાં કામ કરી શકશે.
ગુજરાત પાવર કોર્પોરેશન લિમિટેડ (GPCL)એ સોલર પાર્કના ડેવલપમેન્ટ માટેની નોડલ એજન્સી છે. GUVNL સોલર પીવી પ્રોજેક્ટ્સ પાસેથી પાવર ખરીદી કરશે. EOI બાદ વધુ બેઠક યોજાશે અને ત્યાર બાદ ડેવલપર્સની અંતિમ પસંદગી થશે, જે માટે બિડિંગ થશે. આ માટે રિવર્સ ઇ-ઓક્શન થતું હોય છે.
આ અગાઉ ધોલેરા ઇન્ડસ્ટ્રિયલ સિટી ડેવલપમેન્ટ કોર્પોરેશનના મેનેજિંગ ડિરેક્ટર જયપ્રકાશ શિવહરે જણાવ્યું હતું કે, ધોલેરામાં 5000 મેગાવોટનો સિંગલ લોકેશનનો સૌથી મોટો અલ્ટ્રામેગા સોલાર પાર્ક સ્થાપાઈ રહ્યો છે, તે પૈકી પ્રથમ ચરણમાં 1000 મેગાવોટ સોલર પાવર પ્લાન્ટ સ્થાપવા માટેની કામગીરી ચાલી રહી છે.
એપ્રિલ 2018મા મુખ્યપ્રધાન વિજય રૂપાણીએ આ સોલર પ્રોજેક્ટની જાહેરાત કરી હતી. ધોલેરા સ્પેશિયલ ઇન્વેસ્ટમેન્ટ રિજન (સર)માં ~25,000 કરોડના સૂચિત રોકાણથી 11,000 હેક્ટરમાં 5000 મેગાવોટ વીજળી ઉત્પન્ન કરી શકે વિશ્વના સૌથી મોટા સોલાર પ્રોજેક્ટ માટે મુખ્યમંત્રી વિજય રૂપાણીએ સૈદ્ધાંતિક મંજૂરી આપી હતી.
કેન્દ્ર સરકારે 2022 સુધીમાં 175 ગીગાવોટ બિન પરંપરાગત ઊર્જા પેદા કરવાના મહત્ત્વાકાંક્ષી લક્ષ્યાંકને પાર પાડવા માટે ગુજરાતના આ વિશાળ સોલર પાર્કનો હિસ્સો બનશે અને તે માટે તબક્કાવાર કામગીરી હાથ ધરવાની શરૂઆત થઈ છે.[:]
