બેટરીના ઉત્પાદન માટે ગુજરાત અને જાપાનની ઓટોમોટીવ ઇલેટ્રોનીકસ પાવર વચ્ચે કરાર

ગાંધીનગર, તા.૧૪

મુખ્યમંત્રી વિજય રૂપાણીની ઉપસ્થિતીમાં ગાંધીનગરમાં ગુજરાત સરકારના ઊદ્યોગ વિભાગ અને જાપાનની AEPPL ઓટોમોટીવ ઇલેકટ્રોનિકસ પાવર પ્રાયવેટ લિમીટેડ વચ્ચે કુલ રૂ.૪૯૩૦ કરોડના રોકાણથી લિથિયમ બેટરી ઉત્પાદન વિસ્તરણ પ્લાન્ટસ કરાર સંપન્ન કરવામાં આવ્યા હતા.

આ કરાર પર AEPPLના મેનેજીંગ ડિરેકટર ઇસીઝો આયોઆમા- ICHIZO AOYAMA અને ગુજરાત સરકાર ઊદ્યોગ અગ્રસચિવ તથા મુખ્યમંત્રીના અગ્ર સચિવ એમ.કે. દાસ વચ્ચે મુખ્યમંત્રીની ઉપસ્થિતીમાં હસ્તાક્ષર થયા હતા.

AEPPL દ્વારા ગુજરાતના હાંસલપૂર બેચરાજીમાં બે તબક્કે આ અંગેના રોકાણો કરવામાં આવશે. પ્રથમ તબક્કામાં રૂ.૧રપ૦ કરોડના ખર્ચે લિથિયમ બેટરી પેક અને મોડયુલ મેન્યૂફેકચરીંગ ફેસેલીટીઝ ર૦ર૦ના અંત સુધીમાં ઊભી કરવા સાથે ૧ હજાર જેટલા સ્થાનિક યુવાઓને પ્રત્યક્ષ-પરોક્ષ રોજગારી મળતી થશે.

અત્રે એ નિર્દેશ કરવો જરૂરી છે કે, AEPPL એ પ્રખ્યાત મોટર ઉત્પાદન કંપની મારૂતિ સુઝૂકી કોર્પોરેશન, તોશીબા અને ડેન્સોનું સંયુકત સાહસ છે.

આ સાહસના પ્રોજેકટનો શિલાન્યાસ પ્રધાનમંત્રી નરેન્દ્રભાઇ મોદી અને જાપાનના વડાપ્રધાન શિન્ઝો આબેની ઉપસ્થિતમાં હાંસલપૂર ખાતે ૨૦૧૭માં કરવામાં આવેલો હતો.

આજે થયેલા કરાર અનુસાર AEPPL બીજા તબક્કાના વિતરણમાં ૩૭૧પ કરોડ રૂપિયાનું રોકાણ કરશે અને ર૦રપ સુધીમાં પ્રતિવર્ષ ૩૦ મિલીયન સેલનું ઉત્પાદન ગુજરાતમાં કરશે.

મુખ્યમંત્રી સાથે આ કરાર દરમ્યાન વિચાર વિમર્શ કરતાં AEPPLના મેનેજિંગ ડીરેકટર ઇસીઝો આયોઆમા- ICHIZO AOYAMA એ જણાવ્યું કે, કંપની તેના ફયુચરીસ્ટીક પ્લાનમાં આગામી ર૦૩૦ સુધીમાં ગુજરાતમાં ૬ બેટરી પ્લાન્ટ અને ર ઇલેકટ્રોડસ પ્લાન્ટ રૂ.પ૩ હજાર કરોડના રોકાણો સાથે શરૂ કરવા તત્પર છે. આ પ્લાન્ટ શરૂ થતાં ૮ થી ૧૦ હજાર સ્થાનિક યુવાઓને રોજગાર મળશે. એટલું જ નહિ, અન્ય આનુષાંગિક ઊદ્યોગો, MSMEને પણ નવું બળ મળશે.

રૂપાણીએ કહ્યું હતું કે AEPPLનો આ ગુજરાત પ્લાન્ટ માત્ર ભારત માટે જ નહિ, વિશ્વના અન્ય દેશો માટે પણ લિથિયમ બેટરી ઉત્પાદનથી ગુજરાતને વૈશ્વિક ખ્યાતિ અપાવશે.