તલમાં 4.50, તૂવેર-અડદ-દાળના ટેકાના ભાવમાં કિલોએ રૂ.3નો વધારો કરી મોદીએ ખેડૂતોની મજાક કરી

નવી દિલ્હી
કેન્દ્રીય મંત્રીમંડળમાં મોટા નિર્ણયો લેવામાં આવ્યા છે. સરકારે બજાર સત્ર 2021-22 માટે ખરીફ પાક પર એમએસપી એટલે કે ન્યુનત્તમ ટેકાના ભાવને મંજૂરી આપી હતી. બુધવારે આ અંગે માહિતી આપતાં કેન્દ્ર સરકારે કહ્યું કે એમએસપીમાં ગત વર્ષની તુલનામાં સૌથી વધુ વૃદ્ધિ તલના પાક (રૂ. 452 પ્રતિ ક્વિન્ટલ) પર કરવામાં આવી છે. આ પછી, તૂવેર અને અડદ પરના એમએસપી (બંને પ્રતિં ક્વિન્ટલ રૂ .300) માં વધારો કરવામાં આવ્યો છે.

એટલે કે તલમાં 4.50, તૂવેર-અડદ-દાળના ટેકાના ભાવમાં કિલોએ રૂ.3નો વધારો કરી મોદીએ ખેડૂતોની મજાક કરી છે. એવા પ્રત્યાઘાતો ખેડૂતોના મળી રહ્યાં છે.
બીજી તરફ કેન્દ્રીય કૃષિ મંત્રી નરેન્દ્રસિંહ તોમારે કહ્યું કે વડા પ્રધાનની અધ્યક્ષતામાં બુધવારે મંત્રીઓ પરિષદની બેઠકમાં ખરીફ પાકનો એમએસપી જાહેર કરવાનો નિર્ણય લેવામાં આવ્યો છે. સામાન્ય સ્તરના જે અનાજના ભાવ 1868 રૂપિયા પ્રતિ ક્વિન્ટલ હતા તે 2021-22માં 1940 રૂપિયા પ્રતિ ક્વિન્ટલ થઈ ગયા છે. જે બાજરાના ભાવ 2020-21માં 2150 રુપ્યા પ્રતિ ક્વિન્ટલ હતા તે હવે પ્રતિ ક્વિન્ટલના 2250 રૂપિયા થઈ ગયા છે.
આ નિર્ણયો વિશે માહિતી આપતી વખતે કેન્દ્રીય પ્રધાન પ્રકાશ જાવડેકરે કહ્યું કે એમએસપીને ખરીફ સીઝન પૂર્વે જાહેર કરવામાં આવી છે અને તેમાં પણ વધારો કરવામાં આવ્યો છે. રેલવે ટ્રાફિકને વધુ સુરક્ષિત બનાવવા માટે, રેલવેને 4 જી સ્પેક્ટ્રમ વધુ ફાળવવામાં આવ્યા છે. હમણાં સુધી રેલવેમાં 2 જી સ્પેક્ટ્રમનો ઉપયોગ કરાતો હતો. એટલું જ નહીં, હવે રેલવેમાં સ્વચાલિત ટ્રેન સંરક્ષણની સિસ્ટમ ખૂબ મજબૂત કરવામાં આવી રહી છે. ચાર ભારતીય કંપનીઓએ એવી સિસ્ટમ બનાવી છે કે જેથી બે વાહનોની ટક્કર ન થાય.
તે જ સમયે, કૃષિ મંત્રી નરેન્દ્રસિંહ તોમારે ટ્વીટ કર્યું હતું કે મોદી સરકાર ખેડૂતોની આવક બમણી કરવા માટે પ્રતિબદ્ધ છે. આર્થિક બાબતોની મંત્રીમંડળ સમિતિએ ખરીફ માર્કેટિંગ સીઝન 2021-22 માટે તમામ ખરીફ પાક માટે લઘુતમ ટેકાના ભાવને મંજૂરી આપી દીધી છે. સરકારના નિર્ણયનો લાભ દેશના કરોડો ખેડૂતોને મળશે.
કેન્દ્રીય કૃષિ મંત્રીએ કહ્યું કે વડા પ્રધાન નરેન્દ્ર મોદીના નેતૃત્વમાં છેલ્લા સાત વર્ષોમાં કૃષિ ક્ષેત્રે એક પછી એક એવા ઘણા નિર્ણયો લેવામાં આવ્યા હતા, જે ખેડૂતની આવક વધારશે, ખેડૂતો મોંઘા પાક તરફ આકર્ષિત થશે, ખેડૂતના ઘરે સમૃદ્ધિ આવશે અને ખેતી એક નફાકારક સોદો બની રહેશે. ઉત્પાદન ખર્ચના 1.5 ગણા (અથવા ઉત્પાદનના ખર્ચ પર ઓછામાં ઓછો 50 ટકા નફો)ના સ્તરે એમએસપી નિર્ધારિત કરવાનો સરકારનો આ ક્રાંતિકારી નિર્ણય છે.
કૃષિ કાયદાઓનો વિરોધ કરતા ખેડૂત સંગઠનોને આડકતરી સંદેશ આપતાં કેન્દ્રીય કૃષિ મંત્રી નરેન્દ્રસિંહ તોમરએ કહ્યું કે એમએસપી છે જ અને એમએસપી એટલું જ રહેશે. રવી અને ખરીફના એમએસપી પણ સતત જાહેર કરવામાં આવી રહ્યા છે. એમએસપી ચાલુ જ છે, એમએસપી વધી રહી છે અને એમએસપી પર ખરીદી પણ વધી રહી છે.
કેન્દ્ર સરકારના અન્ય નિર્ણય અંગે માહિતી આપતાં કૃષિ પ્રધાને જણાવ્યું હતું કે ફોસ્ફેટિક ખાતરોના આંતરરાષ્ટ્રીય ભાવોમાં થયેલા વધારાને પહોંચી વળવા કેન્દ્ર સરકારે આ ખાતરો પરની સબસિડીમાં વધારો કરીને ઐતિહાસિક પગલું ભર્યું છે. તેમણે કહ્યું, વડા પ્રધાન મોદીના નેતૃત્વ હેઠળની કેન્દ્ર સરકાર ખેડૂતોના હિત માટે સંપૂર્ણ પ્રતિબદ્ધ છે. તેથી, આંતરરાષ્ટ્રીય ભાવોમાં વધારા છતાં ખેડૂતોને ડીએપી ખાતરની થેલી 2400ની જગ્યાએ 1200 રૂપિયામાં મળશે.