આઊટસોર્સિંગ બેજવાબદારીનું મોટું કૌભાંડ- 1.36 કરોડની ઉચાપત

Outsourcing Scandal: Embezzlement of ₹1.36 Crore गुजरात – 11 लाख आउटसोर्सिंग भरती बड़ा घोटाला- 1.36 करोड़ रुपये का गबन
20 મે 2026
ગુજરાત સરકારમાં આઉટસોર્સિંગ કર્મચારીઓની અંદાજિત સંખ્યામાં કાયમી સરકારી કર્મચારીઓ 4.5 લાખ, કોન્ટ્રાક્ટ કર્મચારીઓ 3 લાખ, આઉટસોર્સિંગ કર્મચારીઓ 3 લાખ, રોજમદાર / અંશકાલીન 1 લાખ,

આરોગ્ય વિભાગ (PHC/CHC/સિવિલ હોસ્પિટલ)
PHCમાં પરામેડિકલ/વહીવટી સ્ટાફના આશરે 88% અને CHCમાં આશરે 75% સુધી જગ્યાઓ કોન્ટ્રાક્ટ/આઉટસોર્સિંગથી ભરાય છે.

અન્ન અને નાગરિક પુરવઠા વિભાગ હેઠળ 2 વર્ષમાં 1,168 ભરતી આઉટસોર્સિંગથી થઈ હતી.

બોર્ડ નિગમ,સ્થાનિક સ્વરાજ્યની સંસ્થાઓ મળીને ગુજરાતમાં 11 લાખ કરાર આધારીત કે આઉટસોર્સીંગથી કર્મચારીઓ હોઈ શકે છે.

જામનગર
સરકારી કોલેજ દ્વારા કોન્ટ્રાક્ટ પરના કર્મચારી સામે ફોજદારી

રોગી કલ્યાણ સમિતિના ૧૫ ચેકમાં ચેડાં પગાર, દર્દી સારવાર માટેની ગ્રાન્ટ ગુપચાવીને પોતાનાં ખાતાંમાં જમા કરાવી કૌભાંડ

જામનગર: જામનગરની સરકારી ડેન્ટલ કોલેજ અને હોસ્પિટલમાં નેશનલ હેલ્થ મિશન હેઠળ કોન્ટ્રાક્ટ આધારિત ફરજ બજાવતા એક કર્મચારી દ્વારા રોગી કલ્યાણ સમિતિના ચેકમાં ફરફાર કરી રૂપિયા ૧.૩૬ કરોડની ઉચાપત કરવામાં આવી હોવાનો ચોંકાવનારો મામલો સામે આવ્યો છે. આ અંગે સંસ્થાના જવાબદાર અધિકારીએ પોલીસ ફરિયાદ નોંધાવવી પડી છે.
સરકારી ડેન્ટલ કોલેજ અને હોસ્પિટલમાં ટયુટર વર્ગ-૨ તરીકે ફરજ બજાવતા ડો. સંજય વલ્લભદાસભાઈ ઉમરાણીયાએ પોલીસ ફરિયાદમાં જણાવ્યા મુજબ, સંસ્થામાં વહીવટી સ્ટાફની ભારે અછત હોવાથી અનેક નાણાકીય અને વહીવટી જવાબદારીઓ કોન્ટ્રાક્ટ બેઇઝ કર્મચારીઓને સોંપવામાં આવી હતી, જેમાં એન.એચ.એમ. ગવર્મેન્ટ કોન્ટ્રાક્ટ કર્મચારી તરીકે ફરજ બજાવતા શોભીત ગર્ગને રોગી કલ્યાણ સમિતિના નાણાકીય રેકોર્ડ અને વ્યવહાર સંભાળવાની જવાબદારી લેખિતમાં સોંપવામાં આવી હતી.

તા. ૧૬ મે, ૨૦૨૬ના રોજ જી.જી. હોસ્પિટલના ડો. કણસાગરા દ્વારા ડેન્ટલ કોલેજના ડીનને ફોન પર જાણ કરવામાં આવી હતી કે, બેંક મેનેજરે માહિતી આપી છે કે ડેન્ટલ કોલેજના રોગી કલ્યાણ સમિતિના ચેક મારફતે શોભીત ગર્ગના વ્યક્તિગત ખાતામાં લાખો રૂપિયાની રકમ જમા થઈ છે. આ માહિતી મળ્યા બાદ ડીન દ્વારા સમિતિના સભ્યો અને અન્ય અધિકારીઓને બોલાવી પ્રાથમિક તપાસ હાથ ધરવામાં આવી હતી. તપાસ દરમિયાન શોભીત ગર્ગ સંતોષકારક જવાબ ન આપી શકતાં શંકા વધુ ગાઢ બની હતી. રોગી કલ્યાણ સમિતિના સેન્ટ્રલ બેંક ઓફ ઇન્ડિયાના ખાતાનું સ્ટેટમેન્ટ ચકાસવામાં આવતા છેલ્લાં છ માસ દરમિયાન કુલ ૧૫ ચેક મારફતે રૂા.૧,૩૬,૧૯,૩૫૦ની રકમ શોભીત ગર્ગના બેંક ઓફ ઇન્ડિયાના વ્યક્તિગત ખાતામાં ટ્રાન્સફર થયાનું સામે આવ્યું હતું.

દર્દીઓની સારવાર તથા આઉટસોર્સ કર્મચારીઓના પગાર માટે ગાંધીનગરથી મળતી સરકારી ગ્રાન્ટના નાણાંમાં ચેડાં કરી ચેકની રકમમાં ફેરફાર કરીને ઉચાપત કરી આ સમગ્ર કૌભાંડ આચરી પોતાના હોદ્દાનો દુરુપયોગ કરી સરકાર સાથે ગુનાહિત વિશ્વાસઘાત કરાયો હોવાનું પણ ફરિયાદમાં જણાવાયું છે. હાલ સમગ્ર મામલે પોલીસ દ્વારા ફરિયાદના આધારે ગુનો નોંધી વધુ તપાસ હાથ ધરવામાં આવી છે.